عيدكم مبارك وكل عام وأنتم بخير

باللهجة اليمنية
………….
العيــــــــد عيد العافية
العافية هي أهم شيء في العيد
فقبل كل عيد تسمع أسئلة كثيرة لك ولمن حولك
هل أشتريت لك ملابس العيد
ما اشتريت وبكم وكيف واين عتسير بالعيد عتخزن عتخرج تلوي بالحديقة (( أصحاب الحدايق غنيمتهم بالعيد ))
المهم ويقتلب معك تحقيق
الشاهد في هذا الموضوع أنه سئلني أحد الأخوه إنما أقول أحد الاباء وهو كبير في السن وهو يقول لي
يايوسف أتكسيت للعيد والا لا
رديت عليه مباشرة وقلت له العيد عيد العافية يا عم
جلست أتفكر بهذه العباره وتذكرت ما جرى لي لأول مرة في عيد الفطر الماضي عندما مرضت من قبل العيد حتى ثالث العيد ولم أتذوق طعم شيء أسمه العيد
حتى الزبيب والمليم والجعاله قرحن جو
فقلت ماذا أريد من كل هذا والعافية غير موجوده
ليس مهم الملبس ولا المأكل ما دامت العافية موجوده والحمد لله على العافية
وقد قررت ان لا أشتري بهذا العيد شي لأشعر بنعمة الله علي بعافيته
(( أصلاً ما قد لبست ملابس العيد الأول ))

……….

..عيد القرم الدافيه …
القرم هي الاقراص والاقراص مش الحبوب يعني العلاجات
وانما أقراص من الذره كنت زمان آكلها في البلاد حتى ذلحين بس نادراً
وطبعاً لها طعم آخر وخصوصاً لو أكلناها مع السمن والعسل البلدي

والملابس الحالية ..
اسبوع قبل العيد أقل تقدير ترى الاسواق مكتضة
اللي انا أستغرب له
ليش ما يروح الناس يصرفو الا قبل العيد بقليل هه
أنتو كمان ليش ما تروحو قبل العيد بشهر تأخذو راحتكم بدل الزحمة والغلى ….
وكل من يشتي يشتري أحسن من حق الثاني
ويوم العيد كل واحد يقول للثاني هيا بكم أشتريت هذا
وبكم طلعت الصماطة والكوت والعسيب وووووو

ههه البعا وما أدراك ما البعاء
أنه معزة وطلي وثور معاااا ودجاجة للمسكين
قد الشعب اليمني ولا عاد أحد يذبح طلي والا معزه من الغلى
مثل ما قال الاضرعي الله يخليه
قال قبل العيد بيومين تجي تبسر الاطلى كل واحد طارح رجل فوق رجل
وبعدا يجي الى عند اللي يبيع يقله بعشره والطلي يقله مااااع يعني لا
وبعدا يتبايعو لما يبيعه ب30 ألف
ومن رابع العيد يجي الواحد مننا يخطى من جنب سوق الغنم وبدل ما يهنجمين هن نهنجم احنا
فيجين يقولين بعاااااا عتجو عندنا

هذه هي أحوال العيد عندنا في اليمن وخصوصاً في صنعاء أينما نحن
هذه هي أحوالنا
كل منا من همه الأول والاخير الملبس
وأيش عيضحو بالعيد
وأيش نوع الجعاله
ولازم توقع الجعاله أغلى من حق الجيران والا حق الاهل
على شان يقولو والله اشترينا غالي وحالي

فلله درك يا غزة فالعرب في حال يرثى
ولا همهم غير حالهم وأنفسهم